WINNAAR LVK 2013
WINNAAR LVK 2013
Laef, Limburg Laef !
Teks & meziek: Ron Roemen
Intro:
Laef
Laef
Laef, Limburg laef!
Hie in oos bourgondisch lendje, in ’t brónsgreun eikehout
Is eder jaor ein fieës, det is al lang bekroeandj mit goud
’t-Is veur ós ‘t allerhoogste waat ’t guuef op dizzen aerd
‘t Hètj hie vastelaovendj en det is ós alles waerd
Refrein:
Laef, laef, Limburg laef!
Riet de kas mer aop en haol de pekskes droet
Laef, laef, Limburg laef!
Boew de wages aaf en roop de prinse oet
Laef, laef, Limburg laef!
Blaos de hoempapa weer de waereld in
Vier ’t neet allein, vier mit ederein
Vier ’t óngerein, vier mit groeat en klein
Vier ’t naevenein, vier ’t achterein
Laef, laef, Limburg laef!
Laef, laef, Limburg laef!
Solo:
Laef
Laef
Laef, Limburg laef!
Kónfetti en serpentines, vlege hie drie daag dore lóch
Det mink zich mit meziek, daovan höbbe veer genóg
Doog daobie ‘n sjeutje gekkigheid en eine flinke hampel spas
‘nne Klódder bóntje kluuere, ‘n porsie joeks en snap uch vas
Refrein
Oze nachtegaal brultj vanne spas
Oze lieëw dae zink voloet
Zellefs die twieë loupe oet de pas
Blaoze same op die toet
Lalalalalalala
Refrein
Laef!
Montfort wint
Det stóng groeat oppe veurpagina vanne Limburger op zaoterdig 2 februari 2013.
Ein veurpagina wo veer, es gewuuen moferter jónges, allein mer van kinne droume mer dae droums is oetgekómme.
Nao twieë Top 5 plaatse (ein prachtige 2e plaats in 2009 en ein 5e plaats in 2011) is hae d’r dan noe………………de LVK-TITEL.
Veer höbben ‘m!!!!!
Bedank allemaol !
Veer höbbe ontèlbare sms’jes, meeltjes en berichte op facebook en youtube gekrege en num ’t ós neet kwaolek: Veer kinne ze nag neet ins allemaol laeze (op dit moment!!) gezwiege allemaol beantjwaorde.
Dus bie deze aan ederein: Danke, Limburg danke!
Danke veur alle hertverwermende kaarte, blome, drankpakketjes, sms’jes, meeltjes en alle anger dinger die veer moogdje kriege.
Hiejónger ein paar links wootj geer nag ‘ns lekker van alles kintj genete.
Ron en Harrold
Danke, Limburg, danke!
Danke, danke danke,
Danke aan ederein dae ós is kómme felecitere.
Danke ane artieste die dao wore.
Danke aan ederein dae ós haet toegespraoke.
Danke ane artieste die opgetraoje höbbe.
Danke veur ein geweldig fieës det veer in Mofert höbbe ...moge belaeve.
Danke det veer nag eine kieër van oos LVK-wins höbbe kinne genete.
Danke aan ederein dae veer vergaete zeen.
Ron en Harrold
De titel zaet waarsjienlek al eine houp zoea neet álles euvere inhoud van ’t leedje womit veer dit jaor Limburg haope te verovere.
Veer gaeve de miense in Limburg ein opdrach mit veur ’t sezoen 2012/2013: Laef, Limburg laef!
Oos vastelaovesleedje is volges ós, enne luuj die ‘m al gehuuerdj höbbe, eine mix van hieël väöl versjillendje meziekstiele. Kóm effe mit de keuke in want dan is ’t mesjien ‘t bèste oet te ligke.
Hie is ’t recep:
Pak ein pan en zit ’t vuur op volle poele: GAAS!.
Doog inne pan ‘nne flinke hampel Hollanse fieësmeziek, neet te zuinig. Sjöd dan ein sjeutje Duitse sjlager en Hollanse pop d’rbie en wèrk det aaf mit ein klóddertje Tirol. Toet slot, ómme meziek aaf te make, nag ein flinke porsie Limburgse vastelaovesmeziek drin sjödde. Neet te neij kieke.
Esse god reurs dan höb se eine euverheerlikke mix van meziekstiele inne pan.
Smiet dao eine leuke Limburgse teks bie dae ederein drek kintj mitblaere en dan höb se eigelek gewuuen ein lekker modern Limburgs Vastelaovesleedje.
Laot ’m uch smake en väöl kiek- en loesterplezeer mit oze clip!!!
