FACEBOOK

header vastelaovend 2015

Euver Ós

Korte biografie

‘t Oet Mofert aafkomstige La Bamba besteit oet Ron Roemen en Harrold Knoben, vrunj van kleins aaf aan. Vol enthousiasme verzorge ze al jaore häör optraejes.

Effe allemaol sjoenkele op ‘nne lekkere wals enne hendjes inne loch op ‘nne fieëspolka. Mer ouch haet La Bamba housemeziek veure jóngere generatie in hoes.

Ze bringe veurnamelek eige leedjes zoeawie ónger angere de vastelaoveskrakers oet 2008 ‘Drök, drök, drök’ en ’Knaokehel op det vel’, womit La Bamba in 2009 ein 2e plaats op ’t LVK behaoldje.

In 2011 waerdje op detzellefde LVK ein 5e plaats behaoldj mit ‘Vastelaovendj in Limburg’.en in 2012 ein 8e plaats mit “Waat se hie zuus det zuus se nörges”.
In 2013 waerdje de 1e plaats behaoldj en ging de Bertha Paulissen-trofee mit nao Mofert. Mit ’t leedje “Laef, Limburg laef!” won La Bamba mit euvermach ’t Limburgs Vastelaovesleedjes Kónkoer. De kroean op ’t werrek!
In 2014 stóng La Bamba same mit zate hermenie de Roepoepers inne finale mit "Hie in Limburg is 't good". Ein 8e plaats woor 't eindrezeltaat.
In 2016 waerdje mit Ederein ein 5e plaats behaoldj.
In 2017 woor 't eindrezeltaat ein 16e plaats mit Halleluja, alaaf!
en in 2018 mit Veer moge weer (daag en nach) ein 12e plaats

In totaal stóng La Bamba 12 kieër inne LVK finale.

Laot uch verrasse dore twieë manne oet Mofert.


Who the f……. is La Bamba ?

Ron Roemen is gebaore op 7-12-1968 in Mofert

 Profielfoto RonRoemen

 

Miene grótste hobbie is óngetwiefeld meziek make mer ouch meziek loestere vinj ich fantasties.
't Bedinke/sjrieve van nuje meziek (tekste/melodietjes) veur La Bamba vinj ich ouch ein hieël groeate oetdaging en keileuk óm te doon. Dit doon ich ouch aaf en toe, op spesjaal verzeuk, veur anger artieste.

Ich bön 25 jaor actief gewaes inne tamboerwaereld (1987 - 2012). Met name de fluit- en tamboerkorpse wore miene groeate passie.
Väöle lof der jury's, Limburgse- en Nederlanse kampioensjappe en hoogs aantal puntjes höb ich es dirigent mit mien vereniginge behaoldj in mien karriejaere.
Óngetwiefeldj de sjoonste herrinneringe höb ich ane succesvolle deilnames mit Excelsior Montfort aan het WMC.
Twieë gouje pauke veure hoogste score vanne daag: Marswedstrijd 1993 en marsparade 2001, mit lof der jury.
En 't hoogs aantal puntje bie de fluiterkorpse oppe marswedstrijd op 't WMC van 1997. ’t Wore ech prachtige jaore van hel en gepasjeneerd wèrke en lang, hieël lang naokaarte☺

'nne Angere groeate hobby van mich is miene hóndj Bongo. 'nne Pyrenese berghondj. Mit Bongo bön ich dageleks versjillendje kieëre inne bós en 't Naturschutzgebiet ''Im Eiländchen" te vinje. Ouch 'n ideaal gelaegenheid veur nuuj leedjes te bedinke.
Det haet zich de lèste jaore waal beweze. Hieël dök kump ónger 't wanjele 't Wickie de Viking zinneke „Ja, ich hab's" bie mich naobaove.
Die leedjes kómme dan eine tied later weer oppe buun trök bie ein vanne optraejes van La Bamba. Optraejes wo ich éch van kin genete.

Same mit mien soulmaatje Anju woon ich sins 2011 in Sjawbrook (Schalbruch) oppe Selfkantj wo 't ós hieël good bevèltj.
Ein dörpke wo Duitsers, en Hollenjers (zoea waere ouch de Limburgers hie genump) handj in handj gaon. 


Harrold Knoben, gebaore op 5-4-1970 in Mofert.

Ich wèrrek inne boetedeens bie Novoferm. Ich höb ein zoontje Tren, ‘nne echte meziek -en foetbalgek! Wo haet d'r ‘t toch vanne ( ‘t foetballe hè hahaha)

Miene shakalaka is Nicolle.......mmmmmmmm waat un lekker stök is det toch nag altied.....

Veer höbbe 2 huundjes Falco en Indy, 2 dobermanne wo van ein dobervruike(haha).

Aan sporte....... zo aaf en toe duuk ich mit de mountinbike de bos inne, lekker ff knalle.....
En veure res........... lekker genete van alles....

 


Mark Claessen, gebaore op 22-01-1969 in Zöstere

Ich bön wirkzaam es ongerwiesassistent op ein  sjoal veur speciaal veurtgezet ongerwies in Heerle.
Ich bön getrouwd met Alexandra en same  höbbe veer twieë  kenjer, eine jung van neuge maondj en ein maedje van vief jaor.

Techniek is miene groatste hobbie en det kump goot van pas bie miene anger bezigheid, namelik ut verhure van leech en geluid en alles waat dao bie kump kieke.

En om det ich bie det alles nog get leage tied euver höb verzörg ich vanaaf november 2012 auch nog ut geluid veur La Bamba.

Väöl tied veur anger hobbies blif er den auch neet euver, mer es ut effe kan den gaon ich waal ens vleege mit mien zelfgeboewde modelvleegtuigskes.

Zoa noe weit geer bienao alles van mich, en zeen veer os  waal eurges bie ein optreje van La Bamba.

 


Laifstorrie

Es start van La Bamba haje veer 1 jannewarie 2000 aan.

't Jaor det in eine kieër, gans toevallig, die "Drie witte doeve" veurbie kwame gevlaoge. Doe vónje ouch de ieëste optraejes plaats. Die doerde euveriges mer 15-20 menute, bie gebrek aan repertoire want dit loog neet inne plenning en veer hawwe d'r dus totaal neet op geraekend.

't Jaor d'rnao woor 't ieëste album van La Bamba vaerdig want platemaatsjappie Telstar (ónger aaveuring van Jos Laumen) zoog 't hieëlemaol zitte mit La Bamba. Bie Telstar (en Limbo Music) brachte veer ouch nag versjillende singles oet. De opnames van versjillende Telstar-leedjes wore bie Pebble Music. Veer wore dao zoea kontent euver det veer oeteindelik de euverstap nao Pebble Music höbbe gemaak en dao 5 gezellige jaore höbbe mitgemaak. Nao versjillende albums bie Pebble Music höbbe veer noe hieëlemaol oze dreij gevónje bie Marlstone Music wo veer vanaaf november 2007 opnumme. Veer veule ós dao hieëlemaol thoes.